قصة واقعية من وحي 7 نوفمبر / حنان بن نصر تونس

قصة واقعية من وحي 7 نوفمبر / حنان بن نصر تونس

كنت أدرس حينها سنة ثانية ثانوي(قبل ما يدخل عليه الأساسي...يعني ثامنة أساسي بمفهوم التعليم الجديد) المهم كان وقتها السابع من نوفمبر. هو التاريخ المجيد والاحتفالات بيه تكون على قدم وساق قبل العطلة الى كنا ناخذوها بهالمناسبة. في الاثناء المعهد متاعنا قرر نهار الجمعة باش نحضروا ورشة الرسم ،ايا تسلحت باوراق تصوير وبعض الفرش الى سارقتهم لاخي واتوكلت على ربي ومشيت .سي الاستاذ الى كان حاضر غايب، قالنا صوروا على سبعة نوفمبر وخرج يعمل في سيقارو مع اصحابه. ،اصبت بخيبة كبيرة وقتها ...اش يهمني فيه هذا السبعة نوفمبر وانا جايا نكبس ونرخف نحب نفتق مواهبي في التصوير. بعدها الكبت قاتلي قلبي. لا نمشي لدور ثقافة الى كانت مخصصة للاولاد. ولا نسمع بمنتديات. ولا نعرف شي. ايا من الغزول شديت هاك الورقة ببراءة الطفولة المتدرجة نحو المراهقة. وعصرت في جد امها جعبة كحلة. وبديت ندهن فيها ،الحق يقال يعجبني الاسود قبل مستغانمي ههههه وبديت نشيخ على التبلبيزة. ونفكرلها في جوها. كيفاش نحط خريطة تونس بالاحمر ،وكل مرة نسترق النظر لاصحابي وانا نضحك على الرقم سبعة الى عامل مسد في أوراقهم ..فجأة ههههههه (وكيما تعودتوا بعد فجأة ثمة مصيبة طبعا ) الاستاذ كمل تبزنيسته على الاستاذة وحب يدور علينا يشوف تصويرة باهية يقود بيها للمدير الى بدوره باش يقود بيها للي أعلى منه وهكذا. ..سي الاستاذ يذكره بالخير. جاء حذايا وتسمر وصاح وقالي فاش تعمل (توة الورقة مزالت كحلة دحيسة نستنى فيها باش تشيح. وننزل عليها بخريطة حمراء _وستر ربي ما نزلتش عليها_) جاوبته قتله نصور قالي مش قلتلكم تصوروا سبعة نوفمبر !؟ ،هوني التلامذة الكل سيبوا اوراقهم وجاو يشوفوا في ورقتي السوداء العارقة من الحشمة. والهمس بيناتهم كلا بعضه .ما نعرفش شنوة الى صابني والا المراهقة نقزت عليا وقتها. وقررت التحدي كيف شفت روحي موضع اهتمام نلعج عليه باجابة دوخته فقلت له :اخي ديما نصوروا في سبعة نوفمبر ما انجموش نكونوا احرار !؟ . وعينكم ما تشوف الا النور ههههه الاستاذ خرجني للسبورة مع ورقتي ، التلامذة الكل ولة مسخفهم حالي، ومشى يجري ورجعلى بالمدير والعساس وبعض الاساتذة ووراهم كتابي الاسود مرددا. كلماتي الشهيرة .ايا قالولي لم دبشك وايجا ولكم ان تتخيلوا (تخيلتوا ضرب!؟ لا ما ضربونيش. وباش ما تشطحوش ياسر بخيالكم. باش نقلكم اش وقع ) .الاستاذ سلمني كعهدة للمدير والعساس اي نعم العساس. الى نعتني وقتها بالمتمردة وجيل اخر الزمان. مع التهديد اش باش يصيرلي وهوني تفلت بالبكاء الطفولي ونسيت حماسي. ولعنت ام النهار الى حبيت نصور فيه ،اما المدير فقرر ببرود احالتي على مجلس التأديب واستدعاء ولي .روحت انوح وعاودت لامي. الى وقع باش تلطف الخبر لبابا الى استغربت انه ما كلمنى حتى كلمة فقط كنت نشوف في نظرة حزن في عينه .كملت جمعة الاحتفالات. عديتها. لوم من امي الى حسب رايها اش مدخلني في هالحكايات. وكيف يقولولي ارسم سبعة نوفمبر يلزمني نرسمها وبالورد كان لزم ، ورجعت مع بابا الى استقبله العساس بوابل من اللوم انه جاب طفلة كيفي ما ربهاش وباش تهزه للفينڨة ومشينا لمكتب المدير. الى ما بعدش بارشا في رايه على العساس لكن هذاكة الكل ما اثرش فيا ولا خلاني نبكي. فقط الى كان السبب في دموعي. هو تذلل ابي باش مانتعداش على مجلس التأديب اولا والعساس ما يوصلش لحكاية ثانيا .يومها فقط عرفت اني رسمت الرسمة الصحيحة وفهمت معنى انك يلزمك تسكت والاهم من ذلك شفت قيمة العساس القواد

حنان بن نصر. تونس.