حوار بين الجنرال والعجوز والشيخ / حسام سعد
حوار بين الجنرال والعجوز والشيخ / حسام سعد
فى سواد الليل ، وبسيارات سوداء تسلل العجوز والشيخ الى مكتب الجنرال وكان هذا الحوار .
الجنرال : اهلا بيكم وتشرفت بلقائكم ولقاء كل وطنى شريف
العجوز : الشرف لينا يا فندم
الشيخ : جزاك الله خير واعانك الله لخدمة الوطن
الجنرال : طبعا انتو عارفين ان البلد بتمر بظروف صعبة جدا ، انفلات امنى ، اقتصاد يتراجع بشدة وسياحة واقعة وبطالة متزايدة علاوة على ازمات انابيب الغاز وغيرها ومقاطعة دول الجوار لنا وعدم ارسالهم الدعم المتفق عليه بالاضافة الى الضغط الامريكى الاسرائيلى ... والبلد تحتاج لقيادة صلبة قوية تمتلك خبرة ورؤية لقيادة البلد فى الظروف الصعبة دى ....
العجوز : معلوم يا فندم
الشيخ : اتفق معاك يا فندم وعايزين قيادة تتقى الله
الجنرال : طبعا و احنا عايزين الرئيس يكون شخصيه متصالحة مع الجميع مش عايزين رئيس تصادمى يهدم كل البلد ، رئيس لديه خبرات فى العمل الادارى ويتعاون مع الجميع .
الجنرال موجها كلامه للعجوز : بصراحة انا شايف فيك يا فندم كل المؤهلات دى وسبق عرضت عليك تترشح للرئاسه وقلت هفكر ، ها وصلت لايه ؟
العجوز : لسه بفكر يا فندم بس اكيد كلامك دا هيشجعنى اكتر ، بس المشكلة انى مش ضامن دعم القوى السياسيه الكبيرة فى البلد .
الجنرال : لا تقلق انا كلمت رئيس اكبر حزب ليبرالى وقال اننا معاك ، وانت ايه رايك يا شيخنا ؟؟
الشيخ : بصراحة انا كشخص مرحب جدا بالترشيح دا ، لكن الامر شورى عندنا ، وبصراحة احنا عملنا جس نبض للقواعد الشبابية واغلبهم غير مرحب ...
الجنرال : ليه مش مرحبين ؟
الشيخ : لانهم حاسين انه مرشح بعيد عن الاسلاميين ومنحاز لليبرالية ..
العجوز : يا شيخنا احنا كلنا مسلمين واحنا شعب متدين وساكون مرشح للاسلاميين وكل المصريين
الجنرال بعد تفكير : فيه حل يا جماعة
العجوز : ايه هو ؟
الجنرال : احنا ممكن خلال الفترة دى نغرس فى نفوس الشعب ان المرشح ليس بعيد عن الاسلاميين ودا باكتر من حاجة ، انه يلتقى كثيرا بكبار المشايخ ودا هيظهر للشعب انهم بيدعموه ، واننا نخلى الصحفيين والاعلام بتاعنا يرسخو الامر دا ويكتبو عن تدين المرشح ونظافة يده ، وطبعا خطباء المساجد لهم دور والتعليمات ليهم جاهزه ، وفى نفس الوقت يظهرو للشعب باقى المرشحين انهم غير متدينين وغير مؤهلين ...
العجوز مبتهجا : شئ رائع
الشيخ : فكرة جيدة جدا بس انا مضمنش كل اصوات الاسلاميين
الجنرال : لا تقلق حاول بس على اد ما تقدر ، وكله مرتب ومعمول حسابه ، حيث كدا اتفقنا ؟؟
الشيخ والعجوز فى نفس واحد : اتفقنا !
الجنرال للعجوز : يلا بقى شد حيلك الفترة الجاية هتتعب شويه
العجوز : اى تعب يهون عشان الوطن يا فندم ، والتعب دا هيجى ايه جنب كل اللى عملتوه سيادتكم للوطن
الجنرال : اشكرك ، وان شاء الله لما تبقى رئيس اتمنى لك التوفيق وعايزين نخلص بقى من موال محاكمات رموز النظام دا وكل حد فى البلد يقلك عليه فلول وكلام فارغ ، وعايزين تفضل علاقتنا مع الدول الكبيرة زى ما هى احنا مش ادهم وفيه بينا اتفاقيات ومصالح مشتركة
العجوز : يا فندم انا هحترم كلمة القضاء النزيه وهرضى بالحكم ومفيش حاجه اسمها اعادة المحاكمات البلد مش حمل الكلام دا ، وان شاء الله انا هتصالح مع الكل ومفيش حاجه اسمها فلول كلنا شعب واحد ، واكيد هحافظ على علاقتنا بالغرب ، واول شئ هعمله لو نجحت ان شاء الله حفلة لم نر لها مثيل لشكر سيادتكم على كل ما بذلتموه لاجل الوطن الحر والثورة .
الجنرال : تمام ، وانت يا شيخنا العظيم ايدك معانا احنا بنعول عليكم كتير
الشيخ : لا تقلق يا فندم انا هحاول بكل جهدى لخدمة الوطن وانتخاب مرشحنا التوافقى المحترم .
العجوز : ان شاء الله خلال ساعات هعلن للشعب ترشحى الرسمى .
انتهى
■كتب : حسام سعد فى 9 مارس 2012
تعليقات
إرسال تعليق